PENDADARAN
Sesingidan aneng telenging nala
sastra jalma datan uninga
amung eka saka dasa
kang angrasa yekti
Padupan kencana kang mawarsa tan kajamah
enggal basuhen
kantthi resiking ati,
Awit Sang Hakarya gya andadar kapercayan mwah sumendhe-pasrah
Hyang Widi ing ngakasa
bareng maring lebu agni,
Hying Widi ing samodra
ancik-ancik panguwasaning baruna,
Uningana iku kabeh
:dudu bebendu
dudu pageblug
Uningana iku kabeh
dudu purwaning gara-gara
dudu sengkala
Kawruhana,
Jer iku mau minangka kayekten
menawa kabeh jalma
salumahing bumi
gya anungkula
Sung sembah lan nadhah sepura
Sakehing rajakaya amung bandha lan bandhu titipan
kang ongas lan gumedhe gya mawangke
kang mlarat lan kesrakat
gya kasebrat!
Lamun tan wanuh lan anggayuh maring
Hyang Eka Sabda
lantaran tumetesing waspa
IMPEN
Gumuruh swaraning prahara
ambedhelake kulit,
nggetasake balung lan ajer sakabehing sungsum
tanpa tandha pratela,
lindhu adi bebeka,
Wekasan…
salang tunjang larining jalma, ngupaya widada
Impen lan pangarep-arep
kang mawarsa kangantha sirna,
rantas tanpa pituwas
sajuga minangka tembung adi
:Hyang Widi hamengku gati
paring pepeling mrih asung bekti yekti
Gancahan, Sirep Surya 8 Juni 2006
No comments:
Post a Comment